Mar 11 | KPX | STEP | Iesuu au esemuhi lohoale tana mole Oliveta keve velehovosege Dielusalemau vuguvuguanu. Tana ke vavae o abuita Betabedi isi Beteni keau ua. Iale o keve Iesuu au esemu abuita hanavei loui avoe, “La tiliege o keve velehovoliege o ke ivie doniki mole doga ataeau avuemo uguiavoholiale ke lulehai mai lohove.

Mark 11

Iesuu o baluga Dielusalemae tinu.

Matiu 21.1-11; Luka 19.28-40; Dioni 12.12-19

1 Iesuu au esemuhi lohoale tana mole Oliveta keve velehovosege Dielusalemau vuguvuguanu. Tana ke vavae o abuita Betabedi isi Beteni keau ua. Iale o keve Iesuu au esemu abuita hanavei loui avoe, “La tiliege o keve velehovoliege o ke ivie doniki mole doga ataeau avuemo uguiavoholiale ke lulehai mai lohove. 3 Ige mesoho ata moleu la belagevei kosea, ‘La osiohoike ke lulehama.’ Ige namihai kosea, ‘Kosiveu avuho isivianu. Iale auna tota hanavoge auna bae lohoi.’” 4 Kateai louge abu tiale o ke ologomo abu avuemo hote beisi mai hadee tavata umuvale ke elehalu. Elehai ke vavehasege oe ata degomoleau lavisi uale keau ke elehai belagevei avoe, “La osiohoike doniki ke vavehama.” 6 Kateige abu Iesuu louale hoto ke loui namigevelu. Ige oe ata keau hotobe loui kelueveholilu. 7 Ige keau doniki ke mai lohoaleau Iesue velehovoi abu dabae ogo malei doniki ke golomo tedige Iesuu biloai golovemo ugulamonu. 8 Ige ata degomoleau abu dabae ogo malei humahala tedisege degomoleau idie ada numute bokoai malei humahala tedisi tilu. 9 Kateisege ata degomoleau Iesuho uli holisi gabi holiale keau baita holahai loui avoe, “Seloo, kou Dilava ivimo lohoale ko nahi hoesehavoi. 10 Subuta nahie mama baluga Deividiu kosive holisi nahie ata nibieveale ke nahate ata kona kosive holisi nahie nibievei. Iale nahi ivive ebagevai Dilava hoesehavoi.”

11 Katelahai lousege Iesuu Dielusalema oe velemaito tiale keu Diue dubu baluga ke uvue onobenobe niaveito gutualelua au esemuhi Betenie tilu.

Iesuu idi mole vigiho louge baioholinu.

Matiu 21.18-19

12 Ladeveliale vavita Iesuu au esemuhi o ke halevai tota Dielusalemae lohoge Iesuu vaeanu. 13 Vaeai haeavamolela idi mole vigiu humuale ke elehai tiale isiviai elehage au baiage au ke bai bukiai isi. Ke huhuai lohoale elehage keu baioholisito numu unahanu. Kosealemo ke baie vaniu lohoholinu. 14 Ige Iesuu idi keho loui avoe, “Atabeu bae tota a bai ilivebene.” Kateige esemuiabeau hotove ke evilu.

Iesuu dubumo maketilahamalebia nunuvenu.

(Matiu 21.12-17; Luka 19.45-48; Dioni 2.13-22)

15 Katelahaito Dielusalemae velehovosege Iesuu halei dubu balugae tiale dubumo maketilahai voivoilahamalebia nunuvenu. Isi moni senisilahamale kebia teibolo ekovehage moniabeu keiolahanu. Isi ugu voiamale kebia batabata ekovehai kebia bahata nunuvenu. Isi ataeau onobenobe malei dubue tai lohomale ke bamunu. 17 Isi ata haivei avoe, “Dilavau Bukae Hotomo loui avoe, ‘Di isiviale ata bahataeau di o komo guliguliai di hoesehavogei.’ Isito laeau kateholisito vavoloe vaveve avuemo vama.” 18 Ige dubu nalimale kosivea isi Diue menaka loui haivemale keau ke evisi Iesu hamaveve humaha kaovama. Kosealemo ataeau vuvuneve hoto ke evisi vikolahale kemoike abu vabulahai isiviai hamai. 19 Kateaniale gutuige Iesuu au esemuhi o baluga ke halevai tilu.

Idi nehe vigi ke deiada

(Matiu 21.20-22)

20 Ladeveliale vavita hovedevei Dielusalemae loholiale humaha tavae idi nehe vigi ke elehage keu bahata giliai gabianu. 21 Ige Bitau Iesuu louale ke huhuai namihai avoe, “Kosive, eleha. A idi neheho louale keu giliai gabianu.” 22 Ige Iesuu abuho loui avoe, “Di louale ko evive. La evievina Dilavaemo uge lana tana moleho loui kosea, ‘Toholahai davalamo tenela.’ Isi la louale kemo dolodoloholisito la uvu bahata mai avuemo mavoge la louale kena seleve holisi. 24 Katealemo di la namigevema. La ono vade loui Dilava imihaliege la uvu bahata mai avuemo mavoge auna la louale ke laovei. 25 La imihaho valiege vasohuta ata moleu laemo vaveve toela vale ke momahavoito Dilava imihaliege otogoe umale la Mama kena la vaveve toela ke ulihai. 26 Isito mesoho ata moleu laemo vaveve toela vale ke la momahavoholige Dilavau bae a toela ke ulihalivebene.”

Kosiveau Iesu vuvunemo belahalu.

(Matiu 23.21-27; Luka 20.1-8)

27 Kateaito loholialeau Dielusalemae velehovoge Iesuu halei Diue dubu baluga keve oai tinu. Oai tisege dubu nalimale kosivea, Diue menaka loui haivemalea isi oe kosive keau lohoale Iesu belahai avoe, “Oleike vuvune kateale aoge a vaveve kateale vama.” 29 Ige Iesuu namigevei avoe, “Di isiviale hoto mole loui la belagevege la ke ihu loui di namihageto di bae oleu vuvune daoge di avuemo vaveve kateimale vamale ke loui la haivei. 30 Di isiviale di namihave. Oleike vuvune Dioni omige au ata babatisogevenu. Dilava emena ataeabulike vuvune omilu.” 31 Kateai louge abu ke evisi moleho loui avoe “Nahiabuna onole loui namihai. Nahiabuna loui kosea, ‘Dilavaike vuvune ominu.’ Ige auna loui kosea, ‘Isito osiohoike la hotove evioholilu.’ 32 Isi mesoho nahiabuna loui kosea, ‘Ataeabulike vuvune omilu.’ Ige keta anekianu. Kosealemo ata bahataeau huhuige Dilavaike vuvune Dioni omige au beloveta holinu.” 33 Hotoeabe keu uoholige abu Iesu namihai avoe, “No Dioniu olemo vuvune male ke no hilokaholilu.” Ige Iesuu namigevei avoe, “La katealemo di bae data di ole vuvunemo vaveve kateale vale loui la namigevelivebene.”